政壇：嶺大公投礙學聯接班？
喺香港大學學生會退出香港專上學生聯會後，各間院校亦醞釀退出學聯，嶺南大學學生會代表會尋日就通過喺下周二至四舉行退聯公投，發起公投嘅嶺大退聯關注組話，依家校內學生對公投嘅反應唔係好熱烈，好難估計公投最後結果。查實嶺大學生會退唔退聯，仲有另一個深層意義，因為本身係嶺大學生嘅學聯常委羅冠聰原本有機會接棒做學聯秘書長，如果嶺大成功退聯，學聯隨時無人接班。
嶺大公投若決定退聯，羅冠聰（右二）就未必能夠參選學聯秘書長選舉。（資料圖片）
學聯會喺三月二十至二十二日舉行周年大會，同時選出新一屆秘書長同各職位，羅冠聰一直被指將接替周永康做學聯秘書長。羅冠聰尋日話暫時未決定係咪參選秘書長一職，但聲稱即使嶺大學生公投決定退聯，由於嶺大學生會已經選出，退聯議案要留畀下一屆學生會執行，所以唔會影響佢代表嶺大參與學聯工作喎。不過，就算公投約束唔到今屆學生會，羅冠聰當選學聯秘書長都可能會受到質疑。
港大學生會之前歷史性退出學聯，已經引發連鎖效應，嶺大學生會會係第二間舉行公投，決定係咪退聯嘅院校，而中文大學、浸會大學、城市大學及理工大學嘅學生亦正收集聯署，籌備舉行公投，相信呢股退聯潮有排都未完結。
