政壇：胡珠做黃大仙半生奴隸
本身係酒樓老闆嘅健康快車副主席胡珠，聘用員工眾多，但係呢位飲食業界老行尊，前半生竟然係奴隸！胡珠日前出席一個道教藝術展時話，佢同道教有不解淵源，除咗佢嘅祖先都係信奉道教外，佢嘅前半生仲係黃大仙嘅奴隸，皆因當年母親唔想佢步上兄長夭折嘅後塵，所以佢年幼時就賣身畀有求必應嘅黃大仙為奴，以期神明庇蔭之下健康成長，所以呢種奴隸生涯並唔艱苦。
胡珠話年幼時為求健康成長，曾賣身畀黃大仙為奴。
胡珠又自爆，佢嘅長輩認為天意最愛作弄身嬌肉貴嘅人，所以就幫佢起一個比較謙卑嘅名，叫胡「豬」，係取其生命力有如豬一樣頑强之意。不過，叫「豬」唔係咁好聽，因此就以同音字「珠」嚟替代嘞！咁胡珠又係幾時結束奴隸生涯呢？佢話結婚之時，向黃大仙誠心上香，如此就算係恢復自由身喇！佢話雖然同黃大仙唔存在賣身嘅契約，但係佢深信舉頭三尺有神明，因此必定奉黃大仙為佢嘅人生主宰。
