政壇：公文袋反水客慢幾拍
由於邊境水貨活動頻繁，引起民生問題，近期出現多次反水客示威行動，唔少更加演變成激烈衝突。有見及此，唔同政黨都就打擊水貨活動提出建議，亦已提得七七八八，點知公文袋黨魁「袋巾傑」同立法會新界西議員郭家麒尋日先至走出嚟提議開徵「即日陸路離境稅」，向經陸路入境，而喺二十四小時內離境嘅旅客徵收稅項，從而增加走水貨活動成本，減低誘因，此舉同白鴿黨提出嘅建議大同小異，真係慢幾拍兼執人口水尾。
設計圖片及對白
阿毛拍范國威 懶理黨友
新民黨喺一個月前已提出要將「一簽多行」封頂，限制旅客每年來港三十至四十次；而富貴黨亦係兩個星期前話會喺兩會期間提案，建議將深圳戶籍居民「一簽多行」改為「一日一行」，減低水貨客對本港居民影響。就連白鴿黨都喺上星期以七招防止水貨客，包括將「一簽多行」改為「一簽八行」；限制入境旅客只能「一日一行」，同埋開徵二十元至五十元陸路旅客入境稅等。
其中白鴿黨提出開徵陸路旅客入境稅同尋日公文袋提出開徵「即日陸路離境稅」只係大同小異，咁點解公文袋要搞到執人口水尾，咁遲先就相關政策回應呢？
眾所周知，該黨嘅立法會新界東議員湯家驊一直同個黨貌合神離；至於郭家麒就一向淨係負責醫療衞生、政改等議題，對於水貨客呢單嘢，佢唔係唔肯做，可能係唔知點做，先至搞到該黨好似後知後覺咁。
不過，其實該黨並唔係無人關注水貨客問題，該黨議員「阿毛」毛孟靜曾多次就水貨問題出聲，更加同新民主同盟范國威以「香港本土」名義，要求政府取消一簽多行，並為個人遊設限。阿毛有建議都唔同黨友傾，反而走去搵隔籬黨嘅范國威，真係各自為政。
