趕客鬧劇不斷 遲早玩死自己

嗱，有數字為證o架。繼去年全年零售額錄得二○○三年以來首次下跌後，今年一月份零售總銷貨額更按年急跌百分之十四點六，唔止比沙士時期更差，甚至成為十六年來最大跌幅嘅一月份，當中尤以珠寶首飾、鐘錶、名貴禮物及服裝表現最差，插水式暴跌一至兩成，問你怕未。

唔使問阿貴，零售業搞成咁，梗係同連串「驅蝗」、「光復」鬧劇有關啦。一小撮激進分子以反水貨客為名，搞風搞雨，喊打喊殺，係人都怕怕喇。有立法會議員就講得啱嘞，今時今日世界各地都視內地旅客為財神爺，招徠猶恐不及，唯獨香港嫌錢腥，將旅客視為蝗蟲。老實講吖，此地不留人，自有留人處，內地客旅遊購物大把選擇，何必貼錢買難受，來香港受侮辱喎。

即係咁，內地旅客過門不入，激進分子就話求仁得仁啫，之但係香港經濟無以為繼，隨時一鑊熟嘅咋。正所謂，一榮俱榮，一損俱損，零售業步入寒冬，受影響嘅點止三十萬從業員咁簡單，連帶旅遊、酒店、餐飲、租務等行業一條龍受害，到時唔知幾多基層打工仔飯碗不保。唔係杞人憂天o架，今個農曆年個人遊旅客已經減少百分之五，內地網民仲發起杯葛行動添，呢個已經係嚴重警號喇。

最無厘頭嘅係，港府迫於激進團體壓力，仲話要同中央檢討個人遊，減少旅客人數喎。其實，收緊個人遊容易，最怕內地旅客蟬過別枝，香港無客上門，到時後悔就太遲。將心比心，香港只為本身着想，有事鍾無艷，無事夏迎春，係人都反感喇。自己冇錢開飯，就要求中央開放個人遊；依家食到肚滿腸肥，又怪旅客太多，乜都你講晒喇。唔怪得有人話，香港人有大香港主義，一切以自我為中心。

打開門做生意，客似雲來本來係好事，家陣好事變成壞事，講到底都係港府無能所致。中央一早提醒個人遊易放難收，點知港產官僚當作耳邊風，一味坐享其成，完全冇做好配套措施，卒之咪搞到咁嘅地步囉。計太一叮話齋，既然有人唔歡迎旅客，不如索性叫停個人遊，咁咪一了百了，耳根清淨囉，叮！