政壇：搞搞政：AV仁辭職公投 恐煲無米粥

據知白鴿黨內對此莫衷一是，支持同反對辭職各佔一半，只係一開始眼見佢打晒開口牌，去意已決，所以先唔多出聲反對。對於黨內溫和派而言，辭職公投基本上就係鎖死立場，冇空間華麗轉身支持「袋住先」。至於激進派亦有意見，認為既然該黨否決方案，事後辭職係無謂，但事前辭職在時間上又趕唔切。

有白鴿黨員預料，呢啲爭議應該會喺黨內發酵，到下月黨大會，隨時有人動員反對，嘗試推翻辭職決定，到時真係否決，就會有下台階畀溫和派轉身。不過，有黨員就認為AV仁唔講都講咗，「一退係死路」，又指五年前係咪對政改中途方案「袋住先」都有巨大分歧，所以今次有分歧都唔出奇。

至於黨外形勢，有黨中人都見到部分泛民因為選票考量、私怨等放軟手腳，導致準備說帖、辭職日期等仲未決定到，可見泛民內部都唔係齊心一致，加上市民似乎又唔多明白、甚至反對辭職公投，批評浪費納稅人大量公帑，所以辭職公投會否胎死腹中，相信唔會等好耐就知道。