港交所今日公布全年業績，業績公布完例牌又要開股東周年大會（AGM）選董事，今年港交所董事局會有新氣象，最少有兩名新血加入。事關港交所十三名董事中，有一半係政府委任，而今屆AGM就有兩名政府委任董事許照中同利子厚「夠鐘走人」。

前行政會議成員林奮強

政府究竟會搵啲乜人代替佢哋呢？有「高人」指點，話正路可從「梁粉」中諗諗喎。市場人士即時展開「估領袖」遊戲，揣測前行政會議成員林奮強可能係理想人選，佢係「梁粉」之一，又對本港金融及地產事務相當了解。

市場又貼另一個可能人選係金管局前「女掌櫃」葉約德，事關本港上市公司一向缺乏女董事，港交所目前亦只有一位女董事梁高美懿，作為上市公司嘅「榜樣」，港交所可能需要帶頭加入多啲女性董事咁話。

我哋第一時間搵當事人證實吓，林奮強劈頭就話「冇聽過」，但佢又補句「我唔可以confirm（確認），亦都唔可以deny（否認），我就算有聽過，呢啲嘢一定簽晒保密協議，唔可以講。」咁講，究竟有定冇啫？

第一手消息請下載on.cc東網iPhone/iPad/Android/Windows Phone Apps