政壇：馬斐森速學書法寫羊字

香港大學尋日舉行春茗，來自英國嘅校長馬斐森入鄉隨俗，除咗用廣東話帶領一班港大管理層祝大家「新年快樂」之外，原來佢仲秘密練兵，前日用一個鐘頭時間上咗堂書法速成班，尋日喺春茗即席揮毫，寫咗個「羊」字，祝賀大家羊年「洋洋得意」，佢仲喺墨寶上印上雕咗馬斐森中文字嘅印章，好有意思。

馬斐森同太太拖埋六歲大狗女Darcy同大家打招呼。

馬斐森用毛筆寫咗個「羊」字，祝賀大家羊年「洋洋得意」。

馬斐森首次喺香港過農曆新年，難得又有幾日假期就同太太周圍去玩，除咗去石澳行山，仲去咗大埔林村許願樹。唔好睇佢平日斯斯文文，原來身手都唔錯，拋寶牒許願一擊即中，但佢唔肯透露許咗個乜嘢願望，怕「講咗唔靈」喎，只係話同家庭有關。

平時好少面對傳媒嘅馬斐森太太都有現身支持丈夫，仲拖埋六歲大狗女Darcy同大家打招呼。雖然Darcy身形比較大，但就好聽話，氹得大家好開心。