政壇：IT界聯署 箍實莫乃光
依家政改嘅形勢岌岌可危，立法會資訊科技界議員Charles莫乃光一向被視為政府重點撬票對象，加上佢之前上電視節目不慎講咗可以考慮「袋住先」，搞到佢事後要急急補鑊，而業界嘅後生仔近日仲發起聯署，要求佢唔好「袋住先」。除政改問題外，創新及科技局之前喺立法會財務委員會一役敗走，業界已歸咎Charles無盡力阻止泛民「拉布」，雖然特首表明創科局會第三度闖關，但部分泛民已經表明會繼續「拉布」，搞到佢兩面受壓唔知點算好。
設計圖片
創科局再闖關勢危
早前醫學界一眾青年醫生用業界民調企圖「箍實」立法會代表「怪醫」梁家騮嗰一票，資訊科技（IT）界一班後生選民最近亦有樣學樣成立前線科技人員議政小組，更喺社交網站發起聯署，呼籲業界選民簽名堅持唔要「袋住先」。有業界更坦言聯署係想「箍實」立場唔多清晰嘅Charles，叫佢唔好漠視業界民意轉軚。Charles就重申會跟大隊否決八三一框架下任何方案，堅持唔肯「袋住先」喎。
另一方面， 創科局將會喺不久將來第三度闖關，但有別上次喺最後一關先至「卡住」，政府今次要再經過小組委員會、立法會大會同財委會三關，能否如期成立都係未知之數。立法會尋日成立有關創科局擬議決議案小組委員會，今次加入小組嘅建制派議員得番兩個，但泛民議員就有成六個咁多，當中仲有表明會「拉布」嘅人民力量陳志全同社民連梁國雄，睇嚟今次唔會好似上次咁審議咗三次就收得工。
不過，如果泛民喺小組委員會已經開始「拉布」，相信決議案有排都未可以交上大會，再加上財委會「拉布」拉番一頭半個月，睇怕創科局可能會再度胎死腹中，到時Charles將再次背負未有盡力阻止泛民「拉布」嘅指控，甚至被批評政治凌駕業界利益。
