城中鏡：陳恒鑌 徐英偉決戰新西？
早前都講過，盛傳民政事務局政治助理Caspar徐英偉已向政府請辭，今年四、五月返回所屬政黨出任總幹事，做幕後大內總管工作，但黨內人半信半疑，認為佢一度密密落屯門區，甚至被傳會於一六年立法會選舉「空降」新界西，令一二年先喺新西進身立會嘅黨友Ben陳恒鑌選情危危乎。
陳恒鑌（左）同徐英偉合照粉碎選舉爭位傳聞。（互聯網圖片）
Caspar同阿Ben呢對「疑似對手」早前喺民政事務局新春酒會上碰頭，兩人選擇合照粉碎爭位傳聞。阿Ben話大家都係同一個黨，加上有心為市民服務，邊個出選都無所謂。
聽到阿Ben咁講，企喺隔籬嘅Caspar起初略顯尷尬淨係識笑，過咗陣先話佢同阿Ben識咗好耐，但一直苦無機會合照，如今終於可以如願以償喎。
