城中鏡：新年內地工人荒 家電大王有妙策
農曆新年假期結束，又係內地工廠員工嘅轉職潮，唔少老闆都各出奇謀留住啲員工。尋日喺沙田馬場見到「家電大王」、德國寶董事長陳國民，佢話以前最惡劣嘅時候，試過新年後返回內地工廠，竟然得番一半員工返工，不過近年情況稍有好轉，約有七、八成員工返工。
陳國民話試過有一年新年後，內地工廠只有一半員工返工。
李鋈麟認為要解決市民上樓問題，要從增加供應着手。
李文恩話內地規定員工年初一至三返工，要支付三倍人工。
高薪好福利挽留
對於留住啲內地職員嘅招數，陳國民坦言非常實際，而且冇乜秘訣可言，就係人工高、福利好同工作環境佳，事關每逢農曆新年後，周邊其他廠房都有缺人情況，有機會爭人用，因此為咗避免啲員工流失太多，佢哋會因應唔同員工嘅需要彈性處理。
不過，又唔係所有廠房都可以於新年期間放大假，理文化工首席執行官李文恩話做化工全年無休，因為化工廠尤其生產清潔劑等液體的工序或運作，一旦停頓會有危險，所以大年初一至三都需要有員工返工，而根據內地相關法例，員工呢幾日返工嘅話，僱主要支付三倍人工，加上佢哋分別位於江西同江蘇嘅廠房習慣聘請當地人，員工家人亦居於當地，因此唔需要特登放長假老遠回鄉過年。
轉頭見到東華三院副主席李鋈麟，講起金融管理局突然出招收緊細價樓按揭成數，佢認為有機會令租盤更緊張，至於係咪令市民更難上車，佢就覺得同之前分別不大。佢又提及，中國人傳統覺得要有瓦遮頭先至安穩，要解決呢個問題除咗增加供應，其他辦法都成效不大。
