政壇：搞搞政：建制兩女將 夾擊郭榮鏗

據聞建制派法律界疑似候選人，其中一人係中小型律師協會創會會長陳曼琪，佢喺反佔中期間，代表潮聯小巴向法庭入稟申請旺角禁制令一炮而紅，有傳佢有意於法律界更上一層樓。

早前有消息盛傳，陳曼琪有機會喺二○一六年立法會九龍東地區直選，接替事先張揚會退下火線嘅黨友陳鑑林，但最近多個消息證實，佢已退出九東嘅遴選，疊埋心水專注法律界嘅工作，包括前日以協會名義力撐政改「袋住先」，令人懷疑佢喺政界已轉換跑道，一心一意喺法律界殺出一條血路。

建制派另一挑戰法律界可能人選係江玉歡。據聞江玉歡當年同陳曼琪係港大法律系同學，本身係國際律師樓禮德齊伯禮律師行合夥人，亦係新民黨成員，舊年一度隨黨赴京訪問，至於佔領行動期間一度發起法律界默站行動，並於接受傳媒訪問時批評法治被動搖。

我哋問過陳曼琪同江玉歡參選法律界議席嘅意向，前者話會繼續服務法律界，強調唔係為咗議席而工作，後者則話依家講選唔選係言之尚早，現時會多啲關注政制發展等事宜。

郭榮鏗接受查詢時話有建制派挑戰係好事，歡迎競爭，又再三強調於佔領期間，已講明要遵守法庭禁制令。究竟佔領行動會否左右法律界中人對業界議席代表嘅要求，時間將可證明一切。