政壇：蔣麗萍做歌手多得「元秋」
有「政壇元秋」之稱嘅立法會議員Ann蔣麗芸早前喺新春團拜時高唱已故歌手梅艷芳嘅歌曲《心債》，一鳴驚人，阿Ann胞妹、前歌手蔣麗萍爆料，話自己當年參加歌唱比賽源於阿Ann鼓勵；阿Ann就話自知胞妹唱功較好，因此決定「讓路」，否則有機會包攬比賽嘅冠軍同亞軍。
阿Ann（左）話自知胞妹蔣麗萍（右）唱功較好，所以喺當年歌唱比賽「讓路」。（互聯網圖片）
阿Ann喺個人會客室節目中訪問胞妹蔣麗萍，蔣麗萍喺訪問中透露，自己加入娛樂圈，受到家姐影響好大，因為家姐喜歡唱歌，佢本人反而係跟住唱，爆料指當年參加歌唱比賽，都係源於家姐鼓勵。
不過，阿Ann即時補充指，其實當年蔣麗萍已報名參加比賽，其後問及係咪有意一同前往，佢笑言如與胞妹一同參加比賽，萬一冠亞軍都攞晒，咁咪冇人幫爸爸蔣震做工廠，加上胞妹喺歌唱方面有潛質，而且唱功較佢好，所以決定「讓路」。
兩姊妹其後談及舊年嘅佔領運動，蔣麗萍感到青年人內心有股怒氣，有憤憤不平嘅心，認為佢哋喺心靈上有所需要，因此佢聯同多名藝人舉辦音樂佈道團，分享如點樣尋找生活價值、平安同喜樂等。
