政壇：吳得掂再逢謝太唔認有拗撬

早前盛傳教育局局長「吳得掂」吳克儉，同教育局前常任秘書長謝凌潔貞不和，兩人尋晚於一個活動相遇並合照，似乎係兩人冇再共事後首度公開合照。吳得掂同謝太齊聲否認不和嘅傳聞，其中吳得掂稱讚謝太係一個好嘅同事，工作表現良好；謝太更首次披露，佢哋一直都冇「拗撬」，共事期間亦相安無事，一切都只係傳媒捕風捉影啫。

吳克儉同謝凌潔貞合照，齊聲否認不和傳聞。

謝太喺今年一月中離開教育局，調去食物及衞生局出任常任秘書長。當問及係咪習慣食衞局新崗位工作，佢坦言自己出任公務員多時，未曾處理同食物衞生相關嘅工作，最近更要處理利賓納被指含有酒精事件，幸好食衞局另一名常任秘書長袁銘輝不時都有提點自己，相信新工作很快可以上手。