政壇：朱鑫源退休文武雙修
最新一期公務員通訊訪問咗稅務局前局長朱鑫源，唔講唔知原來佢能文能武。朱鑫源喺訪問中表示，前年六月退休日期前，已為退休作好準備，開始練習楊式太極拳，花咗兩個月時間就學識，佢透露依家早上用三十分鐘熱身後，用二十分鐘就打完全套一百零八式嘅楊式太極拳。
朱鑫源話二十分鐘就打完一百零八式嘅楊式太極拳。（資料圖片）
朱鑫源又話當心理上接受退休事實後，就要着手發掘愛好，而且最好同另一半共同參與，舉例指佢本人喜愛歷奇探勝，因此同太太一同乘坐郵輪遨遊世界，旅程一般為期七至十日，而首次旅程就係前往阿拉斯加，之後又到過地中海、北歐等地。
其實佢嘅退休生活多姿多采，喺中樂團擔任鼓手，又喺城市大學長者學苑課程旁聽，另外又抽空編寫智能電話應用程式等。
朱鑫源喺訪問末段提及退休前嘅「本業」，強調香港稅制簡單，市民依法報稅，程序並唔複雜，納稅人報稅時所須提交資料，版面相當於一頁A3紙，反觀其他國家可以係二三十頁。
