政壇：唔識用「fb」鬍鬚曾認Out
依家班後生仔都有用社交網站嘅習慣，但貴為財爺嘅鬍鬚曾喺上月底發表財政預算案前夕，先至喺facebook（面書）開設帳戶。佢尋日喺網誌大談面書用後感，自嘲依家先用facebook，好多功能唔識用之餘，甚至連個面書都唔係由佢操刀，相信好多人都會笑佢「out」（過時）喎。
（設計圖片）
鬍鬚曾喺最新網誌透露，由於籌備預算案過程非常忙碌，佢嘅面書戶口唔係由佢「主理」，而係由幾位年輕同事代理，但他不時都有睇番市民嘅留言，留意市民對預算案嘅反應，形容過程相當有趣。佢又提到，將來如有其他適合嘅重要議題，亦會再使用呢個渠道，並會喺適當時候，將個人嘅一些想法同生活點滴同大家分享喎。
雖然鬍鬚曾疑開面書迎合年輕一代，但其實佢骨子裏有懷舊嘅一面，皆因佢喺網誌中提及於《星空奇遇記》中飾演「冼樸」一角嘅美國老牌演員Leonard Nimoy逝世，話事件勾起自己年輕時代去美國留學嘅回憶。佢憶述自己雖然唔係星迷狂熱分子，但當年都有同弟弟一齊「追電視」，形容《星空奇遇記》係上一代人嘅集體回憶。
叫大家代入冼樸世界
鬍鬚曾又話《星空奇遇記》同其他電影嘅分別，在於前者多咗一份人文精神，推介後生仔重溫第一輯《星空奇遇記》。佢話雖然大家或者覺得當年嘅特技可能只係一個笑話，但相信如果大家代入「冼樸」嘅世界，體會佢嗰份「勇闖前人未至之境」嘅氣魄，可能會有另一番感受。
