因內地個人遊旅客湧港「鳩嗚」激發中港矛盾，更有市民組隊落區狙擊商場鳩嗚客，矛盾一發不可收拾，但估唔到連向來與內地客為善嘅工聯會立法會議員KK黃國健都身受其害，為咗買支光管要由上水出番九龍！

黃國健

工聯會尋日舉行新春團拜，KK作為上水街坊就滿肚牢騷，透露早前屋企一盞環形光管壞咗，諗住落街買，點知花咗成個鐘行勻成個石湖墟，通街都係得藥房，偏偏就冇光管買，絕望下惟有第二日直接出九龍買，認真陰公。

不過，就算KK身受其害，工聯會對收緊個人遊政策仍未有方案，好似工聯會榮譽會長陳婉嫻話就算要就一簽多行「封頂」，究竟幾多「行」先至到頂，呢方面政府都冇統計數字，但佢可以肯定個人遊省市唔應該再加，點樣收緊仍然可以慢慢傾喎。

第一手消息請下載on.cc東網iPhone/iPad/Android/Windows Phone Apps