旅客逼爆香港 何必花錢推廣
有人話，女人心，海底針。其實講到變幻莫測，難以捉摸，邊個及得上港產官僚吖。大家有眼見，當局呢頭話要檢討個人遊，控制內地旅客，嗰頭又話要撥款推廣旅遊業，大力吸客，你話係咪自相矛盾，思覺失調吖？
係咁嘅，財政司司長曾俊華尋日公布新一年度財政預算案，提出向旅發局撥款八千萬元，喺未來一年加強推廣旅遊業，包括海外宣傳、舉辦購物節、推出購物優惠等等，仲話會安排大型海外業界訪問團來港添。其實，早前旅發局已向日本、韓國、東南亞等地展開新一輪宣傳攻勢，又話會擴大今年海外推介會嘅規模，豁免本地業界嘅參展費用，希望旅客多多益善喎。
鬍鬚曾係咁講嘅，零售、飲食及酒店入住率喺佔領行動後明顯下跌，加上本港營商情緒及消費表現有所改變，環球經濟亦十分波動，有必要撥款予旅發局等機構宣傳香港，增加旅客及投資者對港嘅信心。
咁就奇嘞，內地旅客愈來愈多，中港矛盾空前尖銳，搞到唔係「驅蝗」就係「光復」，家嘈屋閉，煩不勝煩。特首梁振英仲話，要喺北京兩會期間同中央商討收緊個人遊及一簽多行添。點知話口未完，鬍鬚曾又話要推廣旅遊業，一個嫌旅客多，一個嫌旅客少，你話奇唔奇吖。
即係咁，雖然旅發局聲稱主要推廣對象係其他國家嘅旅客，之但係，外國旅客係人，內地旅客亦係人，當局一方面限制內地旅客，一方面對外國旅客大開中門，到底係歧視內地人定係歧視人民幣呢？中港矛盾已經咁激烈，當局仲要帶頭歧視踩多一腳，唔係幫倒忙又係乜呢？
仲有吖，旅發局不嬲大花筒，唔止曾經有高層被踢爆胡亂使錢，更有花費數億元公帑推廣香港而旅客人次不達標嘅前科，今次又獲撥款八千萬元，究竟係咪物有所值，真係令人懷疑。使錢唔緊要，最怕使得不明不白，甚至爆出醜聞，咁就冤哉枉也咯。
講到底，旅遊業係本港經濟支柱之一，萬一呢條支柱冧咗，香港經濟想唔玩完都幾難。當全世界都視內地旅客為財神爺，搶客猶恐不及，香港偏偏將內地旅客拒於門外，自毀長城，點都講唔通喇。計太一叮話齋，當局與其撥款推廣旅遊業，搞埋晒啲門面工夫，不如增加旅遊景點、提升接待能力好過，叮！
