城中鏡：挑機鬥講廣東話 李小加慘食檸檬
港交所行政總裁李小加一向鍾意小朋友，除咗自己「以身作則」係三個仔女嘅爸爸外，港交所有乜大製作，佢都愛以小孩嚟做比喻，好似滬港通出台，佢就曾經以「嬰兒已經懷胎十月該生了」嚟形容。至於小加總裁最新搞作，就係同小朋友比賽鬥講廣東話。咁都得？
李小加撩小學生鬥講廣東話，點知慘食檸檬。（資料圖片）
話說港交所日前喺羊年開市儀式，特別邀請咗一班小學生嚟表演敲鼓，為開市助興，小加總裁不知睇得幾投入。學生表演完後，小加仲主動攬住其中一個小學生，小孩父母係內地人，小孩當然講得一口流利普通話，小加總裁就主動「撩人」，話不如比賽講廣東話。
點知，小孩好直接話冇興趣比賽鬥講廣東話，反而最想港交所明年再請佢哋嚟表演敲鼓。噢！雖然食咗檸檬，但小朋友畀嘅，小加總裁大概唔覺酸而只覺甜。
