話說財爺鬍鬚曾尋日去立法會宣讀任內第八份財政預算案，派糖派足三百四十億元，係歷來最大手筆之餘，亦係史上最簡潔嘅預算案。雖然佢讀咗唔夠個半鐘就「收工」，但唔少官員照舊「瞓」身支持，建仔嘅黃定光等建制派議員徐徐進入夢鄉，坐喺樓上觀眾席嘅多名行政會議成員亦「頭耷耷」瞓晒覺，唔通佢哋覺得預算案唔夠精彩？

多名行政會議成員「頭耷耷」瞓晒覺。

何俊仁喺開會前被問到會否再睇艷照，佢笑笑口就走咗去。

葉劉淑儀靜靜封五百元利是，答謝梁志祥幫佢講好說話。

財經及庫務局局長陳家強用手托住個頭瞓覺，仲攰過企喺度嘅上司曾俊華？

黃定光用手托頭合上雙眼。

曾俊華太太（後排左三）着住同預算案封面顏色一樣嘅紫色連身裙撐場。

鬍鬚曾每年喺會議廳「讀稿」，曾太黃蓮華都會坐喺上面公眾席默默注視老公嘅一舉一動，尋日曾太仲着上一襲紫色連身裙，同預算案封面顏色襯到絕。今年除咗有曾太坐定定「聽書」外，財爺嘅一對仔女同新抱「全家總動員」撐場，而四大商會會長亦有到場，以示商界對預算案嘅重視，實在非常罕有。

新民黨立法會議員葉劉淑儀甫踏入羊年，就被舞麒麟撞至差點跌倒，但事件亦令佢成為政界「風頭躉」，唔少官員同議員都上前「慰問」一番。葉劉喺預算案宣讀期間，先係寫張紙仔「飛鴿傳書」畀建仔嘅梁志祥，再喺個位上靜靜哋把一張五百元入落利是封。葉劉解釋係想多謝梁志祥「出口相助」，話自己被舞麒麟撞親係好意頭咁話。

醜聞一周年 AV仁夠小心

財委會主席張宇人同醫學界「怪醫」梁家騮更乘機扮撞到葉劉，葉劉除咗大叫「你揩油啊！」仲反寸張宇人點解唔打番條麒麟呔。議員劉慧卿喺會後問葉劉有冇被麒麟「撞傷」，葉劉就笑住話：「無事無事，呢排好多人有心，最有心問候係民主黨。」劉慧卿聽到後即刻話：「咁不如買啲麒麟啤返嚟啤一啤佢？」葉劉就回應道：「都好喎，但去邊度搵啲麒麟啤返嚟？」

尋日係白鴿黨議員「AV仁」何俊仁喺會議廳睇艷照醜聞一周年，雖然AV仁照舊帶住部平板電腦入會議廳，但佢全程正襟危坐，唔敢睇水着女之餘，亦唔敢瞓覺，佢嘅黨友單仲偕一度瀏覽有關AV仁嘅即時新聞，但AV仁就視若無睹，擔心被人影到，再次出醜。

第一手消息請下載on.cc東網iPhone/iPad/Android/Windows Phone Apps