政壇：搞搞政：葉劉麒麟先生 3握手示好
行政會議成員兼立法會議員葉劉淑儀喺年初二於車公廟被「靈獸」麒麟撞飛險跌倒後，成為羊年農曆新年嘅熱話。經過多日網民熱論後，尋日葉劉終於有機會同麒麟「真身」、灰窰下村村民謝立元師傅會面，兩人三度握手，以示友好，葉劉仲笑笑口叫師傅「唔使着草」，希望對方唔好嫌棄，下年要繼續邀請佢出席儀式喎。
（設計圖片及對白）
葉劉淑儀（右）同舞麒麟師傅謝立元（左）三度握手，並笑言「不撞不相識」。
謝立元（右）向葉劉淑儀（左）示範舞麒麟時嘅「安全距離」。
師傅換替身 純環節更替
其實事發之後，葉劉話已經聯絡過新界鄉議局副主席張學明，希望可以搵到謝立元師傅，交代一聲自己「冇事，冇驚，係意外一場」。尋日傍晚，二人喺沙田鄉事委員會會面，葉劉一到場即與謝立元握手示好，並二話不說，將一封五百元大利是贈予謝師傅，表示「唔好意思」。
講番當日情況，葉劉話係因為撞到鄉議局主席劉皇發後，臨時決定前往，喺匆忙下冇特別安排企位。其後謝立元亦澄清當日並無任何人「企錯位」，只係儀式進行期間，嘉賓早咗少少起步，先導致發生今次事件。十幾歲開始舞麒麟嘅謝師傅仲即場示範舞麒麟時嘅「安全距離」應為三個身位，等下次大家冇預先排好企位都「知碇」企邊度喇！
至於謝師傅喺「撞飛」葉劉淑儀後換上替身一事，謝師傅解釋由於舞麒麟所花費力氣相當大，所以佢哋早已安排好唔同環節由唔同隊員負責，佢同另一位同村兄弟進行完「拗門角」步驟後，立即轉由另一位麒麟隊成員、即係佢嘅姪仔，進行「拜四方天地」儀式，所以佢完結自己負責嘅部分後，便離開休息。
尋晚葉劉前後同謝師傅握咗三次手，仲講笑話握手時感覺到對方隻手肌肉好紮實，有機會要跟師傅學武，又話自己閒時有健吓身，笑言連議員張華峰及張宇人都話自己可能會被撞得郁嘅話，佢被撞開都唔係好出奇啫，講到尾今次被「撞」都有好多人幫佢頂住，又有人扶起佢，無驚無險，算係「不撞不相識」喎。
