電子文件已經普及化,但立法會秘書處每年仍要為議員影印大量文件,耗用咗唔少紙張。秘書處秘書長陳維安繼前年試行新系統,將原議案同各修正案合併,慳番唔少紙張後,嚟緊會喺下星期一起,立法會轄下所有委員會發出文件複本時,只會以電子複本方式透過內部電郵系統發畀非委員嘅議員,希望減省紙張。不過,如果議員表明想以影印文本方式,收取特定委員會發出嘅文件,都可以同秘書處提出。

陳維安

另外,有啲文件都喺限制以外,例如係載有邀請全體議員參與討論嘅委員會會議議程(唔包括討論文件)、由工務小組委員會及人事編制小組委員會發出,並分送財委會其他委員嘅討論文件副本等。其實電子化都係大勢所趨,與其只係揀部分文件用電郵傳畀議員,不如叫大家齊齊轉用平板電腦睇文件,仲可以隨時上網瀏覽其他資訊,真係既環保、又方便,除非有個別議員適應唔到新科技嘅啫!

第一手消息請下載on.cc東網iPhone/iPad/Android/Windows Phone Apps