政壇：人力再拉布阻開創科局

商務及經濟發展局局長蘇錦樑前日話會再向立法會「闖關」，提交成立創新及科技局嘅決議案。局方尋日就向立法會提交文件，透露特首會同行政會議喺前日決定，下月中會再向立法會大會提交決議案。人民力量立法會議員「慢必」陳志全揚言今次會再次「拉布」，「拖死」創科局。

蘇錦樑就創科局向立法會「闖關」，泛民揚言再「拉布」。

成立創科局的原決議案，其實已經喺舊年十月通過，但因立法會財務委員會未能喺本財政年度通過撥款，而該決議案只覆蓋本財政年度，即將失效，所以政府需再次提交決議案，將生效日期延至二○一五至一六年財政年度，開設職位涉款二千九百七十萬元，同舊年相若。

慢必話決議案每人只能發言一次、每次十五分鐘，所以「阻唔到幾多」，但主戰場係喺財委會審議申請撥款，到時可以透過不停發言同提出動議「拉布」，務求「拖死」創科局。