香港現時嘅最低工資係時薪三十元,遲啲將會加到三十二點五元,不過咁,唔少食肆出到時薪八十元都請唔到人,你話奇唔奇怪吖?

唔係講笑o架,農曆新年係飲食業嘅旺季,亦係老闆最頭痛嘅時候。自從實施最低工資後,飲食業長期鬧人手荒,平時人手已經緊張,要靠大批散工頂檔,一到挨年近晚,問題更加惡化,好多散工跳槽,加上唔少新移民返鄉下過年,唔少食肆十個煲得七個蓋,無計可施之下,被迫以遠遠高於市價嘅八十元時薪「搶人」,搞到經營愈來愈困難。

其實,飲食業勞工短缺已經唔係一朝一夕嘅事。統計顯示,一一至一三年持牌普通食肆增幅唔到半成,但餐飲服務業職位空缺增幅就高達七成六,人手供求嚴重失衡,搞到飲食業叫苦連天。有立法會議員警告,長期人手不足會令投資者卻步,導致成個行業萎縮。

講開又講,香港經濟結構畸形,人力資源錯配嚴重,「有工冇人做,有人冇工做」情況相當普遍,何止飲食業有人手短缺問題。例如建造業咁吖,由於基建工程陸續展開,港府又加快興建房屋,導致人力需求缺口愈來愈大,尤其係紮鐵、石屎等工種,就算人工不斷提高,加幅郁吓就達到雙位數字,結果一樣請唔到人。

本來呢,本地請唔到人,輸入外勞係另一種選擇,只要有適當監管同控制,勞資雙方利益得到平衡,完全可以做到雙贏。弊在香港社會高度政治化,輸入外勞被視為「政治不正確」,除咗商界之外,根本冇人敢提起。唔怕唔識貨,最怕貨比貨,港府高官成日羨慕新加坡可以高速增長,「要人得人,要地得地」,其實,各有前因莫羨人,新加坡做得到,香港未必做得到,例如新加坡可以大量填海,香港得咩?新加坡可以大量輸入外勞,香港又得咩?

莫講香港同新加坡無得比,家陣連內地城市都後來居上喇。呢,上海有人建議引進外傭,提高當地嘅家政服務水平。照咁睇嚟,外傭遲早北上搵食,到時香港可能連外傭都出現短缺,問你怕未。

講到底,社會及經濟問題,其實都係政治問題。香港背靠內地,本來可以近水樓台先得月,從內地高速發展中分一杯羹,可惜香港樣樣政治掛帥,政客為反對而反對,港府動輒得咎,寸步難行,唔怪得香港競爭力每況愈下喇,叮!

第一手消息請下載on.cc東網iPhone/iPad/Android/Windows Phone Apps