城中鏡：議員顯廚藝 合製全羊宴
多名立法會議員喺年初五趁機大顯拜年「煮」意，其中以資訊科技界議員Charles莫乃光同會計界議員Kenneth梁繼昌最應節，於羊年合力炮製全羊宴。負責煎羊架嘅Charles大談當中秘訣，話首先要買一隻羊架，然後逐一劈開，隔一晚再加啲檸檬、海鹽同香草煎香，不過當問到係咪親手製作，佢笑笑口話「我都有幫手煎o架」。
莫乃光（左）同梁繼昌應節炮製全羊宴。
劉慧卿（前中）稱讚尹兆堅（前右）等人煮嘅餸菜賣相好。
王庭聰（中）早前率眾向饒宗頤（右三）拜年。（受訪者提供圖片）
Kenneth就負責煮烤羊肉，佢話呢味餸做法簡單得多，只需要用錫紙包起羊肉，放入焗爐焗兩個鐘就得o架嘞！佢仲透露，著名廚師李錦聯係佢皇仁書院嘅師弟，可惜皇仁冇家政堂，令佢冇機會向對方偷師。
卿姐盛讚黨友靚餸
民主黨主席劉慧卿同日率領黨友同傳媒團拜，其中黨兩名副主席尹兆堅、羅健熙亦大顯廚藝，合力煮咗大蝦沙律、黃金蝦球、香草薯角同糕點等菜式。尹兆堅話今次係第二次煮黃金蝦球，可能因為少用無火煮食，所以有少少失手。
至於其他嘅黨友坐定定喺側邊等食，卿姐等人大讚餸菜賣相好，而議員胡志偉話平日主要係煮吓啲家常小菜，太複雜嘅就唔多識煮喎。
王庭聰年尾迎快婿
另外，港區全國人大代表王庭聰一如往年，喺新春期間去咗國學大師饒宗頤家拜年，仲透露今年十二月將會協助舉辦饒宗頤嘅百歲壽宴。值得一提嘅係，繼大女舊年出閣，王庭聰細女喺今年十二月亦會擺酒，仲記得佢當時送咗層樓畀大女做結婚禮物，唔知今年會送乜嘢畀細女呢？
