話說建制派六名獨立議員包括商界廖長江、保險界陳健波、體文界馬逢國、建築界謝偉銓、金融界「星爺」吳亮星同旅遊界姚思榮六人，舊年因泛民主派拉布戰而結合，佢哋六人合作咗半年，都未諗到改乜嘢名好，所以外界多以「六散人」去稱呼佢哋，據聞有泛民以「中字派」形容佢哋，暗示多人有中資背景，而拖延多時後，「六散人」尋日趁新春團拜時正式正名為「六人組」。

陳健波新朵 「衝擊波」夠響

據稱「六散人」曾諗過多個名稱，包括「六君子」等，但基於用呢個名通常無好下場，甚至係被犧牲嘅機會多，因此最終由星爺一錘定音，決定叫做「六人組」，底因係夠簡單，據知「六人組」會輪流做召集人，現時由廖長江先擔任，至於幾時至換人出任，佢哋不約而同話無乜所謂。

不過，如果以為「六人組」代表佢哋太溫和，無乜殺傷力，咁就太睇小佢哋，事關六人組之一嘅陳健波，最近畀馬逢國改咗個花名叫「衝擊波」，原因係佢次次喺立法會發言都瞄準泛民發炮，例不虛發、火力十足，一定衝散泛民口中歪理。

陳健波承認，的確唔少建制派議員都好期待佢發言，不時問佢點解仲未到你講，不過「衝擊波」話自己講道理，唔係衝擊其他人，應該叫「道理波」好啲，之不過馬逢國強調，「衝擊波」呢個名夠響，易入腦，而且陳健波係用言語去衝擊人，啱晒o架喇！至於「衝擊波」同佢所屬嘅「六人組」第一波攻勢係乜，大家認真要拭目以待嘞！

第一手消息請下載on.cc東網iPhone/iPad/Android/Windows Phone Apps