政壇：向發叔投降何君堯狙「仁」
喺村代表選舉結束之後，新界二十七鄉鄉事委員會下月換屆，有傳鄉議局主席劉皇發今屆決心收復失地，從Junius何君堯手上重奪屯門鄉事委員會主席，因為Junius一旦落選，連帶鄉議局執委甚至屯門區議會當然議席都冇埋，但時移勢易，最新發展係佢決定唔同發叔爭，積極考慮喺年底區議會選舉，瞄準身兼屯門區議員嘅立法會議員「AV仁」何俊仁屯門樂翠選區，同AV仁嘅接班人溫朗鈞一較高下。
何君堯（右）踏入羊年，宣布唔同劉皇發爭奪屯門鄉委會主席嘅位置。（受訪者提供）
瞄準屯門區會議席
Junius尋晚破天荒以屯門鄉委會主席身份，宴請屯門同元朗鄉頭食團年飯，更罕有邀得發叔同枱食飯兼大方合照，唔通二人已經就下月換屆傾掂數？Junius直認不諱，賣口乖話發叔對鄉情駕輕就熟，下月選舉一定力撐發叔爭贏自己個位，認真割愛。
所謂「有失必有得」，據知Junius今次心甘情願向發叔奉上主席位，係因為有關方面支持Junius以律師形象，期望「格食格」奪回AV仁盤據多時嘅屯門樂翠選區，難怪發叔同Junius踏入羊年就提早團年！
