政壇：之鋒認瘦反駁軍訓傳聞

佔領行動舊年底結束後，學民思潮召集人黃之鋒低調咗唔少，最近新搞作就係飛咗去美國，出席加州大學洛杉磯分校嘅社運研討會。佢喺當地接受網媒訪問，總結過去兩年發生過嘅一切，自嘲如果真係如某報道所講，受過美國海軍陸戰隊訓練，自己就唔會咁瘦。

重提舊事似借題發揮

舊年有親中報章一度話，黃之鋒曾秘密接受美國海軍陸戰隊訓練，因此懷疑佢同外國勢力勾結，依家黃之鋒主動重提舊事，加上將呢件事掛喺口邊，一係佢仲未放低件事，一係就好識借題發揮。

此外，黃之鋒喺訪問又再提及舊年成班同學去台灣旅行被跟蹤一事，質疑中央派員對佢作出嚴密監控，竟然連佢住邊間酒店、機票來回時間都一清二楚。呢件事舊年曾經哄動一時，不過由於只係得黃嘅一面之詞，最後都不了了之。