政壇：政總設計師嘆佔中嘥料
外號「門常開」嘅添馬艦政府總部舊年受佔領運動影響，多處出入口一度遭圍堵，而佔領行動舊年底結束至今已兩個多月，「門常開」、俗稱「公民廣場」嘅政總東翼前地同立法會等一帶仍然多處「被圍」，講緊嘅係一堆鐵馬圍住晒，以防再爆衝突，搞到政總設計師Rocco嚴迅奇鬼咁傷心，佢接受外國傳媒訪問時話，鐵馬代表所有人唔再互相信任，違背設計原意，其後又批評佔領人士無將「門常開」範圍用到盡，非常嘥料。
嚴迅奇批評佔領人士無將「門常開」範圍用到盡，非常嘥料。（資料圖片）
Rocco舉例指出，好似添馬公園，本來預咗畀人享受公共空間，點知示威者只識得示威，唔識搞慶祝活動，等喺政總返工嘅人一邊返工，一邊望住佢哋玩，場面幾得意。不過，Rocco都有讚佔領行動帶來唔少驚喜，好似「連儂牆」，其存在本來就有生命，而佔中時貼滿寫上鼓勵說話、色彩繽紛嘅便利貼，更豐富「連儂牆」嘅生命。
