政壇：葉劉死撐代鄉紳擋麒麟
話說立法會議員葉劉淑儀年初二到車公廟，突被從後入廟嘅麒麟撞到整個人飛開，幸有旁邊鄉紳上前扶持，事後成為網上熱話，葉劉尋日再談此事，反駁有「口痕友」指佢當時「唔識企位」，又自言「如我可以代替鄉紳父老們捱了一撞，亦未嘗不是一件好事」。唔知鄉議局主席劉皇發等鄉紳會否心生感激，定係覺得有人一廂情願呢？
葉劉淑儀早前喺車公廟畀麒麟撞到整個人飛開，幸身旁鄉紳上前扶持，事後成為網上熱話。（資料圖片）
駁斥口痕友 稱無企錯位
葉劉喺社交網站話，閱報得知有啲「口痕友」話佢被撞原因，係因為佢當時「唔識企位」，佢反指對方可能冇了解清楚現場環境，強調睇過新聞片段嘅朋友都知，當時人多擠迫，現場水洩不通，根本冇可能「揀位企」。佢其後仲話就算呢隻麒麟冇撞到自己，相信亦可能會撞到其他鄉紳父老，自言如可以替鄉紳父老們捱咗一撞，亦未嘗唔係一件好事。
雖然葉劉冇點名話邊個係「口痕友」，但答案可謂呼之欲出，因資料顯示，立法會議員葛珮帆上周六同傳媒新春團拜時疑「抽水」，認為「君子不立危牆之下」，又暗嘲葉劉「企得太前」，先畀麒麟撞到險倒地，似乎「麒麟熱」又會掀起新一輪鬥嘴。
