政壇：李小加開市「指狗為羊」？

尋日係港股羊年首個交易日，港交所主席周松崗同行政總裁李小加主持羊年開市儀式，發現小加總裁戴咗條花碌碌嘅領呔，近睇原來係好多隻狗仔玩皮球。不過，小加總裁就堅稱領呔上面嘅只係貌似狗嘅羊，唔通佢想「指狗為羊」？

李小加堅稱領呔上面嘅只係貌似狗嘅羊。

記得舊年馬年，周松崗同李小加都係綁金黃色領呔，今年就齊齊揀咗紅色領呔，小加總裁條呔仲有多隻「羊仔」玩球嘅圖案，非常趣致，唔知係咪寓意貨如輪轉呢？

另外，今年開市儀式除咗邀請咗多位證券界人士出席，仲請嚟英華小學學生表演中國鼓樂，寓意朝氣勃勃同充滿活力。近二十位中國鼓隊嘅小朋友落力表演由該校創作同編排嘅曲目《鼓舞飛揚》，為現場增添唔少喜慶氣氛。