政壇：阿忠與工黨瀕決裂
工黨同街工立法會議員「阿忠」梁耀忠之間嘅關係，一直可以用「這麼近、那麼遠」嚟形容，因為兩者無論喺政治、社福同經濟政策嘅立場都非常相近，工黨亦因此一直想招攬阿忠入黨，壯大工黨聲勢，不過一直只聞樓梯響。但事件近日有新發展，就係阿忠改為同其他獨立泛民合組「七劍俠」，擺明同工黨分道揚鑣。
其實早喺上屆區議會選舉前，工黨已經不斷游說街工同佢嘅靈魂人物阿忠加盟，但阿忠一直以心繫街工為由不停請工黨食檸檬。雖然係咁，工黨同阿忠一直維持友好關係，喺多個議題上都緊密合作，甚至連飯盒會要分成四組嗰陣，阿忠都揀同工黨一齊，就連工黨何秀蘭都曾講笑話阿忠先至係佢哋嘅影子黨魁。
私評AV仁損人不利己
但據聞自從白鴿黨「AV仁」何俊仁宣布要辭職發動變相公投後，阿忠同工黨之間嘅關係慢慢起咗變化。事關工黨力撐AV仁辭職，該黨主席李卓人仲加入由泛民政黨組成嘅工作小組，為AV仁幾時同點樣辭職等具體細節出謀獻策。不過，阿忠就成日私下表明唔明點解AV仁要做啲損人不利己嘅事，更唔明點解工黨要瞓身支持，言談間似乎唔多同意工黨嘅決定。
民協立法會議員ＫＫ馮檢基尋日同傳媒拜年時透露，阿忠喺新年前決定離開飯盒會內工黨團體，改為加入佢哋陣營，同其餘六名獨立議員結成聯盟。ＫＫ話由於佢哋多咗一個人，原本「六壯士」嗰名已經唔啱用，於是佢哋就改咗「七劍俠」呢個新名，以示歡迎阿忠加盟。我哋尋日亦有打過畀阿忠問佢同工黨分道揚鑣嘅消息，但佢就無回覆。
