年頭嘈到年尾 日日都係赤口

嗱，傳統呢家嘢，有時真係唔到你唔信o架。尋日有位八歲小朋友就因為唔肯去拜年，同阿爸吵大鑊，結果居然驚動警察到場調解。所以話，不聽古人言，吃虧在眼前，真係一啲都冇講錯。

即係咁，赤口不宜拜年，好多市民轉到車公廟祈福，已經成為一種習俗。雖然尋日落毛毛雨，但善信嘅誠心絲毫無減，只見人頭湧湧，香火鼎盛。唔少善信都話舊年香港爭拗多，特登嚟祈求今年社會和諧。有人更加不惜工本，豪花幾百元購買特大風車，希望轉番個靚運喎。

咁又係呀，香港愈來愈政治化，搞到家嘈屋閉，一年三百六十五日都好似赤口咁，唔單止市民睇見眼冤，連政務司司長林鄭月娥都話羊年最大願望係一個「和」字，希望社會更和諧，大家和衷共濟；佢仲話政改方案年中就會表決，到時無論成功定失敗都應該有個了斷，反對派應該結束喺立法會嘅不合作運動喎。

唉，望梗係咁望啦，可惜樹欲靜而風不止，政客為反對而反對，已經到咗只問立場不問是非嘅地步，連經濟民生議題都唔放過，又點會咁易放棄不合作運動吖。例如主流民意希望政改方案「袋住先」，點知反對派一於少理，繼續企硬到底，你話港府有咩計呢？家陣冇嘢怕，最怕政改一拍兩散，佔領行動捲土重來，香港想唔玩完都幾難。

正所謂，家和萬事興，家衰口不停，一個社會淨係掛住內耗內鬥，唔死至奇吖。呢，有辦你睇o架，台灣曾經係亞洲四小龍之一，點知「民主化」後反而衰過舊時，藍綠惡鬥不斷，族群日益撕裂，經濟停滯不前，競爭力每況愈下。香港都係一樣，港英時代冇民主，市民安居樂業，經濟蒸蒸日上，反而有「民主」之後就家嘈屋閉，永無寧日。講到底，如果民主唔係帶嚟繁榮進步，而係吵吵鬧鬧，呢種所謂「民主」真係要唔要都罷咯。

始終都係車公靈籤講得啱︰「色則是空空是色，觀音曾勸世間人。」做人最緊要面對現實，腳踏實地，一味好高騖遠，不切實際，到頭來盞得個吉嘅咋，叮！