政壇：搞搞政：涉襲葉劉麒麟險遭鄉紳算帳
新民黨立法會議員葉劉淑儀前日首次踏足車公廟，見證鄉紳為香港求籤，點知甫踏入車公廟門口石梯，即遭瑞獸麒麟撞到彈開，事件成為各方熱話，但原來仲有下文，有傳當日舞隻麒麟嘅係新界原居民醒獅隊，佢哋好可能因此畀鄉紳秋後算帳，唔通鄉議局主席劉皇發要扭隻麒麟耳仔？
林偉強笑言「無下次」
葉劉捱撞至飛彈開條片經《東網》報道後，即被網民瘋狂轉載，初二求籤發生咁嘅事，梗係驚動鄉議局上下，我哋問過鄉議局副主席林偉強，佢笑笑口話，事發時佢同葉劉只係相隔幾個身位，佢趁解籤時已即刻慰問葉太傷勢。佢話鄉紳絕對唔會搵班麒麟晦氣，但會設法令事件不再重演，明年舉行車公誕儀式時，會要求醒獅隊唔好趁嘉賓入場時並排表演，改為入場前、後表演助興，以免再有「襲擊案」發生。
不過，亦有口痕友質疑，葉劉當日企得太前博上鏡惹禍。沙田鄉事委員會係車公誕搞手，前日為沙田求籤、但入廟時排位仲後過葉劉嘅沙田鄉委會副主席李志麒就向我哋證實，沙田鄉委會從來冇邀請過葉太出席，對葉太話係獲邀參加都晒頭。不過，新民黨上年同紮根沙田嘅公民力量結盟，同沙田關係密切咗，葉劉因此亮吓相都唔難理解嘅。但網民似乎對麒麟更關心，不但慰問佢傷勢，仲反過來譴責葉劉擾亂車公廟秩序。
