政壇：橄欖引退仔女接班上位

橄欖尋日冇避忌，揀正年初三同傳媒團拜，佢透露，女兒陳詠欣早前喺無對手下，自動當選十二笏村居民代表，連同曾出任十二笏村原居民代表及居民代表嘅橄欖太太，同佢外父，橄欖一家前後出過三個村長，真係好少有！而佢嘅大仔又已經進身政壇，做咗區議員，一家人真係公職多多。

五黨友爭住接棒

不過，橄欖似乎更鍾意家庭極速擴張，三年抱五名孫仔，佢笑指，過去三年共有五個孫仔出世，而且都係男孫，最大嘅近四歲，最細嘅只有九個月大。新年期間一家大細團聚，場面認真大陣仗。橄欖長子、觀塘區議員陳俊傑就話，佢兩個囝囝一代係跟族譜改名，因此中間第二個字都一樣。

話題轉到明年立法會選舉，橄欖去年曾提及六名區議員報名參加黨內遴選，接棒佢喺九龍東地區嘅直選議席。橄欖透露，黃大仙區議員陳曼琪已知會他退出遴選，又形容目前其餘五人是旗鼓相當，不過仲未進入大直路，預料今年中先會有結果。