名媛寇鴻萍長女Lydia唐貝詩最近簽約中國3D數碼娛樂，進軍影圈，佢坦言向來喜歡睇電影同研究戲中演員嘅演技，加上性格情緒化，覺得頗有成為演員嘅條件，而佢為咗裝備自己，自掏腰包上咗一個月演藝課程，佢話：「我驚自己將來拍戲做得唔好，所以自發性去上演技課程，至少有個基礎，令自己有多啲信心，我希望可以成為一個實力派嘅演員。媽咪都支持我，佢向來覺得我好藝術家脾氣，佢都鼓勵我做自己鍾意嘅嘢。」佢笑言由細到大都夢想可以擁有超能力，所以最想拍攝一部類似《X-Men》嘅科幻電影。

唐貝詩早前設計共六款手袋，以英倫風同Punk Rock為靈感。

除咗學戲，Lydia搞作多多，早前應手袋品牌之邀，合作設計手袋系列，一共六款，以英倫風同Punk Rock為靈感，佢解釋：「因為我以前喺英國讀書，好鍾意Rock n Roll，所以用咗窩釘元素嚟做個圖案，仲有蘇格蘭嘅格仔，以及love、faith、believe呢啲字去表達Rock n Roll精神，發放正能量。我大概花咗一個月時間去構思，好開心品牌今次搵我設計。」

第一手消息請下載on.cc東網iPhone/iPad/Android/Windows Phone Apps