城中鏡：亞視財困「籌旗」 名人紛潑冷水
正陷入財困嘅亞洲電視仍然出糧無望，想盡辦法撲水「籌旗」，除咗有人出奇招，發起「一人一萬元救亞視」認股行動外，近日又變賣家當，又傳洽商「白武士」。記者前晚喺馬場同多位名人講起呢個城中熱話，但個個都唔多睇好，又話集資呢招行唔通，有錢寧願捐畀慈善機構或者搞好自己盤生意仲好過喎。
陳正欣認為亞視公開集資行唔通，救到今次救唔到下次。
李宗德夫婦（右及左）帶甚少露面嘅細女李美智（中）入馬場玩。
施榮懷寧願捐錢畀慈善機構，都唔買亞視股份。
香港鐘表業總會前主席Daniel陳正欣話按有關集資嘅規定，企業若超過五十位股東，就要依循上市公司嘅規定。問題係亞視並非上市公司，無可能招收咁多位股東，就算佢想上市，連年虧蝕嘅業績根本無可能過到關。再者，就算渡過今次難關，若將來再遇到財政危機，唔通又再招攬另一批股東咩？佢又話自己身為馬迷，經常睇亞視嘅賽馬轉播，若果亞視倒閉，佢會覺得好可惜。
施榮懷：捐錢行善好過
同樣熱愛賽馬嘅莎莎國際主席Simon郭少明就話，亞視若然有乜「冬瓜豆腐」，賽馬轉播自然有其他電視台接手，所以如果亞視不幸執笠，佢都唔覺可惜喎。至於會唔會出手幫吓亞視，Simon耍手擰頭話，若有餘力，寧可用嚟搞好自己盤生意。
中華廠商聯合會前會長施榮懷都對亞視無興趣，加上公司前景不明，實在好難吸引投資者。所以佢覺得，與其入股亞視，不如捐錢去慈善機構好過。在場仲見到公民教育委員會主席李宗德夫婦同好少現身嘅細女李美智，美智正喺澳洲讀大學，趁農曆年返港陪吓父母，認真孝順。
