政壇：羅范鬧大舊無禮做法似伊斯蘭國
行政會議非官守成員羅范椒芬早幾日上電台同立法會議員「大舊」陳偉業隔空駁火，大舊即場踢爆羅范曾以短訊鬧佢「拉布」影響人會「天誅地滅」。點知幾日後，羅范再上同一間電台語出驚人，話大舊當日不禮貌回覆短訊，先用「天誅地滅」回敬。佢仲爆一句話大舊呢種態度如「伊斯蘭國無啦啦捉人斬頭」。
羅范尋日上電台再為創新及科技局講好說話，佢話對立法會未能表決有關撥款，感到痛心同失望。當佢重提上次同大舊嘅隔空駁火時，似乎仍然相當氣憤，佢話自己向來「人不犯我、我不犯人」，曾經約見部分「拉布」嘅泛民主派議員，點知全部請佢食檸檬，羅范惟有發短訊畀眾人游說，好似「長毛」梁國雄都好禮貌回覆，只得大舊一人以不禮貌回應。
羅范形容大舊呢種回應手法好似「伊斯蘭國」咁，無啦啦捉咗人哋去斬頭，仲話自己喺政府已經示弱咗好耐，所以一定要還擊。大舊聽到羅范話佢似「伊斯蘭國」，就話羅范反應過敏，有妄想症，缺乏常識，但唔諗住再約見羅范，以免對方愈解釋愈錯喎。
