政壇：葉振南率「為食團」訪粵東

上任汕頭商會會長無耐嘅葉振南，日前就打響頭炮帶隊遊粵東四市，包括汕頭、汕尾、潮州同揭陽市，隨團成員有成五十幾人。行程主打考察加美食，副會長吳漢忠、常務會董張詩培都加入「為食兵團」，每日盡情食好嘢，十足拍旅遊節目咁款。

揭陽市嘅音樂噴泉「加班」演出，葉振南（中）同吳漢忠（左）、張詩培（右）細心欣賞。（受訪者提供圖片）

葉振南仲帶隊食巨型獅頭鵝、手打魚蛋、韭菜茶粿同普寧豆乾等，款式花多眼亂。但團友最想係睇揭陽市內嘅音樂噴泉表演，繽紛激光同一百米高嘅水柱共舞。可惜到達現場時一滴水花都唔見，原來噴泉表演每星期只演一場，正當團友以為緣慳一面，突然傳來噴發式水聲。噴泉「忽然加班」，葉振南笑稱係有心人安排，畀驚喜大家。