政壇：葉劉年宵擺檔扮羊講「理」
多個政黨都趁農曆年宵擺檔宣傳，順便吸金。維園年宵上周五已開幕，但新民黨尋日先搞開幕禮，搵咗一班地區議員撐場，當中新界東嘅區議員出席者最多，開拓該區意味甚濃。主席葉劉淑儀仲扮埋羊兼揮毫寫揮春吸引人流。
葉劉淑儀（左二）舉起雙手扮羊，田北辰（左一）擺出恭喜手勢。
葉劉話，問黨友用一個字評價舊年，佢哋好多人都用個「理」字，認為佢哋係理性、講道理，呢樣嘢都係香港應該有嘅特質。佢又不點名批評泛民政黨，話有政黨年宵主打攻擊、侮辱人身，鼓勵社會不良風氣，希望來年祥和、講道理啲。為配合「理」字，該黨今年就主打「理」字文件夾、「我愛理」同「撐理」便條。
至於副主席「田二少」田北辰到一到就趕住走，原來佢要趕搭飛機去加拿大溫哥華，慶祝外母九十大壽，年初七財政預算案當日早上先返港，唔怪得之佢咁緊張啦！另外，有傳該黨灣仔區議員黃楚峰決定今年底唔會連任區議員，仲已經搵咗一名女將頂上，但黃楚峰只係話「考慮緊」，最終由黨決定去向喎。
