珠寶商人Cally鄺美雲一向係愛狗之人，佢尋日出席寵物節擔任動物醫生愛心大使，佢仲帶三隻愛犬到場支持添！

鄺美雲帶同愛犬到場支持動物醫生宣誓就職。

問到同男友林達民分手後首度情人節，會唔會覺得有啲寂寞？Cally話：「去咗佛光會開會員大會，因為過年陸續會有新春團拜。其實都有好多人約，有二十至三十個朋友搞派對，去咗其中一個。」追問唔係話有個男仔追緊佢咩？佢話：「冇呀，朋友好好笑，話要搵番寫嗰位記者，封大利是畀佢，因為係一個祝福。根本冇咁嘅事，冇所講嗰個男仔，自己身邊唔覺有，日日都咁忙。」

Cally有指忙於照顧Cash、Euro同Bank「三爺孫」，又話：「佢哋三隻個名都係一個系列，都係同錢有關，因為佢哋都係男仔，所以要搵配種，但每個我都會要仔，同一性別冇咁易打架，如果係囡囡就送畀人。」咁識新男友條件係要愛三爺孫？佢話：「最基本，但其實冇特別搵，一個人仲好，多啲時間嘛，有同冇都唔強求。會愛朋友，之間嘅叫大愛，而愛情就難啲，都過咗咁嘅年紀，二十幾三十歲就會急結婚，但過咗就急都急唔嚟，同埋都唔急。」

第一手消息請下載on.cc東網iPhone/iPad/Android/Windows Phone Apps