政壇：曾德成引李斯籲納人才

今年施政報告為咗應對人口結構變化，會考慮參照外國研究制訂人才清單嘅可行性，但泛民主派就指控政府引入內地專才，係要「換血」咁話。民政事務局局長曾德成尋日依舊化身「鍵盤戰士」，發表網誌反駁呢個講法，重申至今流傳嘅各類清單都純屬虛構。

曾德成

佢之後就搬出兩千年前、戰國時期楚人李斯向秦王政寫嘅《諫逐客書》，當時秦王政喺宗室大臣鼓譟下，驅逐六國客卿，李斯都被驅逐。佢之後上書秦王政，話秦國要強大，務必要廣納人才，逐客係倒行逆施。秦王猛然大悟，廢除「逐客令」，先至有中國第一個「天下一統」嘅大業。

德成局長話香港本來地少人稀，資源有限，成功係靠各方人才資源匯聚。其實佢都係想講，係咪擴大引入唔同專業和技能嘅人才，首要係關乎觀念意識，勸勉港人要好似秦國咁廣納人才，要提防胸襟變得狹窄、吸引力走向衰微喎。