政壇：龐愛蘭區選勢受狙擊
喺二○一二年「嫁」入地區政團公民力量參選立法會嘅沙田區議員Scarlett龐愛蘭，舊年並未有跟隨公民力量加入新民黨，今年底區議會選舉就要繼續以半獨立身份出戰。原本建制派一向有協調參選機制，確保唔會自相殘殺，可惜Scarlett無入新民黨，結果惹來經民聯派人搶位。呢位對手就係有律師背景嘅Ricky申偉基，尋日仲喺黨嘅旺角花墟年宵攤位亮相添，睇嚟Scarlett要醒定啲嘞！
（設計圖片及對白）
新星申偉基頻落區
尋日年宵攤位開鑼，立法會議員林健鋒、盧偉國同梁美芬喺現場大派賀年糖果，連勞工及福利局局長張建宗都到場助興，同市民拜個早年，祝大家身體健康，現場仲有醒獅助興添！不過，不論醒獅定係議員高官，都唔及政壇新星Ricky搶鏡，事關佢外形出眾，一出場就令在場人士眼前一亮。Ricky○六年喺澳洲畢業返港工作，依家做律師之餘，仲兼任經民聯社區發展幹事，主要幫街坊做吓法律諮詢。
喺社交網站上發現，家住火炭嘅Ricky好積極落區，臨近農曆新年仲派吓揮春，又會同黨內區議員一齊出席運輸署會議，都算係相當積極，唔知係咪有意參選區議會呢？Ricky話依家主要做地區服務，區選之事就遲吓先講喎。如果Ricky真係打算落戶火炭，相信會係越級挑戰，皆因已連任兩屆區議員嘅Scarlett都有相當知名度，想搶位都唔係咁容易。
除咗佢哋之外，有傳公文袋大律師楊岳橋都有意出選火炭區，佢都係打正專業人士旗號參選，如果Scarlett畀Ricky分咗啲票，都唔係無危機。若果將來三個人一齊出嚟爭一個議席，咪變成個「嬲」字。
