致謝鬧劇無厘頭 東施效顰盞出醜
如果香港有「最不知所謂獎」，立法會嘅施政報告致謝動議一定當之無愧。議員不務正業，年年廢噏，唇槍舌劍，面紅耳赤，結果幾乎年年都係得個吉，你話係咪無厘頭兼不知所謂吖。
嗱，今年又係咁喇，立法會白白浪費三日時間，如無意外，動議又係過唔到。最搞笑嘅係，議事堂上唔止口水多多，而且充滿火藥味，建制派同反對派針鋒相對，個個扮晒為民請命，查實講嚟講去都係三幅被，純粹做騷嘅咋。
係人都知，致謝動議根本冇任何意義，立法會年復一年爭論呢個無厘頭嘅議題，完全係虛耗光陰，浪費公帑。唔係冤枉佢哋o架，回歸至今三位特首總共發表咗十八份施政報告，除咗個別例子之外，絕大部分食檸檬。尤其係家陣咁嘅政治環境，反對派為反對而反對，港府淪為跛腳鴨，施政動輒得咎，做多錯多，更加唔使旨意得到立法會致謝，花費咁多時間做場大龍鳳，直頭係唔衰攞嚟衰喇。
講開又講，施政報告致謝動議係港英時代嘅遺物，早就應該丟入垃圾桶喇。以前港督每次發表施政報告，立法局都會例牌「致謝」一番，以示「皇恩浩蕩」，喺殖民時代一啲都唔出奇。問題係時移世易，香港回歸已經十八年，立法會仲唔肯放棄殖民地嘅遺物，當正係寶，照舊行禮如儀，試問今夕何夕吖？唔通真係做慣奴才難自棄？唔怪得連京官都話本港公務員回歸後唔識「當家作主」喇！
再講吖，回歸後官員係公僕，再唔係高高在上嘅大老爺，市民至係主人，公僕向主人匯報施政綱領係履行職責，天經地義，根本唔需要致謝。相反，如果公僕做得唔好，就要向主人謝罪o架。
係人都知，家陣香港七國咁亂，政治、社會、經濟、民生問題一大堆，急需處理嘅議題多不勝數，好似創科局撥款申請咁吖，由現屆政府上任時拗到依家，仲未有結果，今個禮拜六就係最後限期，過唔到關，又要從頭嚟過，你話係咪搵嚟搞吖。立法會正經事唔做，反而浪費時間喺致謝動議，簡直匪夷所思！
所以話，政客無賴，政府無聊，市民無奈，再係咁搞落去，香港想唔死都幾難。計太一叮話齋，立法會與其東施效顰，年年做埋啲無聊又無意義嘅致謝騷，不如為市民做啲實事好過喇，叮！
