城中鏡：黃進達率「家己冷」探基層感觸良多
富二代經常予人不知民間疾苦形象，新任潮州商會青委副主任兼康泰旅行社董事總經理Jason黃進達，近日就帶隊成立一隊「家己冷」義工隊，首次探訪西環同黃大仙低收入家庭，期間被長者捉住訴苦，差啲感觸落淚。
黃進達（右二）同太太Tania（左二）、青委司庫林秀鳳（左一）同委員周博軒（右一）齊派福袋予長者。（受訪者提供圖片）
義工隊吸引逾百人參加，除青委主任馬鴻銘外，潮州商會會長張成雄、副會長高佩璇等都現身支持，齊齊拎住福袋，走訪有五十年樓齡嘅西環觀龍樓。
舊式單位設計唔係按順序，而係左兜右兜，Jason話若然無社工帶隊，應該會蕩失路。獅子山下有千萬個悲情故事，今次探訪都聽唔少，有人呻配偶過身後，只剩孤零零一人，認真淒涼。
中學就開始做義工嘅Jason有唔少體會，佢話探訪時切記勿「晒命」、「晒幸福」，例如見到獨居長者，就唔好問人點解一個人住。今次探訪後，佢話會再走訪其他區，希望一年內走勻全港十八區喎。
