城中鏡：中聯辦新春酒會 厚顏貪曾「被消失」
「貪曾」前特首曾蔭權爵士捲入貪腐醜聞案，經廉政公署調查近三年仍懸而未決，貪曾就繼續逍遙，上周三仲厚顏出席灣仔會展舉行嘅中聯辦新春酒會，點知全程無得上主禮台，只可以面懵懵喺台下眼望望，亦冇回應係咪擔心被檢控，最後急急腳走人。有心水清嘅人就對比中聯辦官方網頁刊載今年同去年嘅新春酒會圖片，發現去年有貪曾嘅圖片，但今年貪曾就「被消失」，所有圖片都冇佢蹤影，認真耐人尋味。
中聯辦網頁刊載今年新春酒會圖片，其中一張係林健鋒（右）同中聯辦副主任王志民握手。（互聯網圖片）
去年
中聯辦網頁去年有刊登貪曾同張曉明（右）握手嘅相。（互聯網圖片）
今年中聯辦新春酒會，貪曾全程無得上主禮台，面懵懵喺台下眼望望。（資料圖片）
董建華及梁振英同時站在主禮台上，貪曾冇份。
中聯辦近年於新春酒會後，都會整理酒會致詞內容及酒會現場圖片，今年亦都唔例外，網頁共刊登咗十多張圖片，除咗中聯辦主任張曉明致詞、全國政協副主席董建華、特首梁振英等主禮嘉賓進場等圖片外，大部分都似於貴賓室內合照，卓妮當日亦見到貪曾抵達會場後，一支箭進入貴賓室。
相比去年新春酒會有貪曾同張曉明握手嘅圖片，但今年未見有貪曾嘅圖片，相反同樣身在貴賓室內，兩名行政會議成員葉劉淑儀同林健鋒分別同兩位中聯辦副主任嘅合照，就被挑選刊載到網頁。
有分析指，正如內地官方媒體對於報道內容、排名先後，甚至刊登哪些圖片都好講究，特別係內地依家全力打貪，如有內地官員於某些應該出現嘅場合，於官媒發新聞稿及發相片時「被消失」，都令人懷疑係咪另有內情。
去年有刊登貪曾相片
同樣地，貪曾去年起一連兩年都出席中聯辦新春酒會，事後圖片一年有一年冇，加上早前內地官媒亦報道，廉政公署已完成貪曾被指涉貪案件嘅調查，律政司稍後將決定是否對其作出檢控。
因此，今次貪曾「被消失」認真耐人尋味，係咪意味貪曾將會「落鑊」呢？睇怕貪曾都係有得震無得瞓嘞！
