政壇：每周之星：至叻星：勁劏柴油車王倩儀除污有力

為咗改善空氣污染，環保署動用逾百億元推出俗稱「劏車」嘅特惠資助計劃，分階段淘汰約八萬二千輛歐盟四期以前嘅老舊柴油車，至舊年已有二萬宗「劏車」申請，八千多部輕、中型貨車「消失」，初步已見成效。但勢估唔到，旅遊巴及主要經營保母車嘅私家小型巴士嘅新車登記數目急增，顯示唔少新人入行。業界指換車計劃令大批從業員由貨運轉投客運，令人關注司機嘅駕駛心態同技術能否配合，有立法會議員更促請當局支援職業司機及柴油車維修業界轉型。環保署署長王倩儀唔可以掛一漏萬，應該主動同運輸署研究一下，點樣妥善處理呢個問題，如果影響到業界生計，分分鐘畀人鬧爆。