政壇：搞搞政：恐創科局遇拉布 羅范詛咒大舊？
聽日係政府就創新及科技局向立法會財務委員會申請撥款嘅「死線」，如果通過唔到，就會宣布壽終正寢。好耐無露面嘅行政會議成員羅范椒芬，可能身兼科學園董事會主席，對此特別上心。尋日佢接受電台訪問時，大力為創科局保駕護航，話香港無咗科技發展唔得，好快被其他地區如新加坡追上，要求議員「放過」創科局。佢又爆響口，建議議員如果真係要「拉布」，「要玩喺其他嘢玩」。呢個講法係咪自私啲呢？如果照佢咁講，莫非議員應該改喺政改表決時「拉布」？如果係嘅話，政制及內地事務局局長譚志源真係多得你唔少。
設計圖片及對白
羅范講講吓，突然有聽眾打入去直播室，一聽原來係人民力量嘅議員「大舊」陳偉業，仲爆料話羅范前晚曾畀過短訊佢，要求佢唔好「拉布」，因為「我愛香港，不忍見香港沉淪」。大舊話前晚回覆羅范一句短訊：「有你們管治，香港便會沉淪」。
被回敬「最毒婦人心」
點知羅范再回敬佢一句「天誅地滅」。大舊形容呢句最毒，鬧到佢狗血淋頭，估唔到真係最毒婦人心。
見大舊玩爆料，羅范今次非常冷靜，兼且拎出自己部手機讀出短訊。羅范承認有咁講，但全句係「剃人頭者人亦剃之，傷害無辜者，天誅地滅」，意思係如果有人傷害無辜者，先會被天誅地滅。大舊當然不滿解釋，質疑羅范咁講，即係話「拉布」者會被天誅地滅？羅范被逼到埋牆角，惟有辯解自己只係想創科局成立，然後就無再解釋點解用「天誅地滅」四字。
其實平時大舊喺立會發言時，都唔好得去邊，一時叫人「狗官」，一時又叫人「落地獄」，但估唔到羅范用到「天誅地滅」嚇人，作為行會成員咁講，會否過咗火呢？
