政壇：吳克儉度掂過「為食新年」
被批評頻頻外訪嘅教育局局長「吳得掂」吳克儉，一講到外遊就生猛晒，尋日佢同傳媒團年時透露，早已計劃好趁農曆新年放大假，展開佢嘅「為食大計」。
吳克儉話農曆年會返鄉下祭祖，順便食好嘢兼浸溫泉。
愛好食好嘢嘅吳得掂，向來對食物質素都好講究同好有要求，尋日搞嘅傳媒團年午宴，都要選址中華廚藝學院。佢話已安排好農曆新年節目，首先喺年初一向父母拜年，除咗拜年，另一重點係要食媽媽親自煲嘅愛心皮蛋瘦肉粥，佢仲強調：「我真係好鍾意食」。拜年翌日嘅節目又係乜嘢呢？答案都係「食」。佢話農曆年初二至初五會返去鄉下恩平，祭祖尋根，跟住的話題都係離唔開食同歎，「咁多年都無返過鄉下，但聽聞嗰度啲野菜好有營養，又可以享受吓溫泉」。
