政壇：派副手撐港交所 馬雲小加夠老友
港交所行政總裁李小加同阿里巴巴集團主席馬雲有幾老友？從上一次阿里想以合夥人制度來港上市，小加總裁差不多「瞓身」支持，已可見一斑。原來故事仲有下集。
李小加請咗馬雲副手蔡崇信來港，做港交所「腦震盪」集思會演講嘉賓。（資料圖片）
聽聞上個禮拜港交所董事局同一眾高層開一年一度嘅「腦震盪」集思會時，就邀請咗馬雲位副手，即係阿里巴巴執行副主席蔡崇信於百忙中抽空來港，做集思會嘅演講嘉賓，講吓近年市場最熱門嘅話題「新經濟」，可見阿里真係幾畀面小加總裁。
記者仲八到，其實小加總裁本來係直情想邀請馬雲嚟，只因為馬雲近排真係太忙太忙，所以先至由副手代為出席，令一眾高層錯失小加同馬雲高手過招嘅機會。
咁又係嘅，馬雲近排應該真係幾忙嘅，面對連串打假風波，美國又話要進行集體訴訟，聽落都頭痕。不過，來日方長，「雲加會」始終有機會嘅。
