政壇：阿王轉戰區唔怕開荒
靠九龍東起家嘅工聯會，○八年立法會選舉開始，先慢慢成功闖出新界西同香港島，唯獨新界東同九龍西議席多年來一直落空。不過，隨着明年立法會選舉議席有變，港島區七席減一席，九龍西亦五席加一席，有傳工聯會因此即時轉陣，先派出依家係勞工界功能組別議員嘅郭偉強頂替「阿王」王國興轉戰港島區，阿王就再轉區空降九龍西插旗，希望為工聯會實現「零的突破」，轉嚟轉去，難得阿王笑言唔怕做選舉開荒牛。
設計圖片及對白
阿王先喺勞工界功能組別出線，之後轉戰新界西同港島區，雖然三戰三勝，但一二年選舉只係掹車邊攞到港島區最後一張入場券，假如佢明年又貿貿然越級挑戰九龍西，議員生涯分分鐘玩完。阿王尋日同傳媒茶敍時就大耍太極，話工聯會嚟緊四月改選，到時會聽從領導話事；佢又自言生肖屬牛，可能工聯會想靠佢呢隻開荒牛開拓九龍西喎。係咪去邊區參選都無怨無悔先？阿王就叫我哋問榮譽會長鄭耀棠好過喇！
吳秋北「抗拒」當啟華
講起工聯會，佢哋嘅理事長、有「工聯會吳啟華」之稱嘅吳秋北，早前一度傳出同郭偉強競逐參選立法會港島區，但隨着郭偉強落戶港島嘅風聲日濃，吳秋北預料會安守本分連任理事長。
不過，平日形象斯文嘅吳秋北原來唔多鍾意「工聯會吳啟華」呢個朵，佢話冇乜留意吳啟華主演嘅電視劇，個人亦唔鍾意同任何人類比，對呢個花名只可以用「抗拒」嚟形容，仲話唔想靠似阿邊個邊個去谷知名度。不過，吳秋北早前提出將內地《國安法》條文以附件形式納入《基本法》已經夠晒爆炸性，依家肯定好多人識喇！
